Скопје - Од 29 до 31 октомври 2013 година, во х.Александар Палас се одржува меѓународна работилница на тема „Подобрување на доброволната усогласеност преку едукација“. На настанот организиран во соработка со Интра-европската организација на даночни администрации (IOTA), учествуваат 39 претставници на даночни администрации од 20 држави, како и претставници од IOTA и IBFD (International Bureau of Fiscal Documentation).
Во фокусот на работилницата е едукација на даночните обврзници, која е значаен фактор кога станува збор за доброволното пријавување и наплата на даноците.
Кои се формите и методите на едукација кои ги применуваат даночните администрации, кои се главните причини и карактеристиките на даночните обврзници кои не се усогласуваат доброволно со даночните закони...се само дел од прашањата на кои даночниците на тридневната работилница разменуваат искуство со цел примена на методи и практики кои даваат најдобри резултати, користење на практични мерки за да се адресира недостигот на знаење на даночните обврзници, утврдување на можни пречки во достигнување на доброволната усогласеност и понатамошен развој на едукацијата на даночниот обврзник.
Исто така, учесниците на настанот имаат можност да се запознаат и подетално со процесот на едукација на даночните обврзници, односно како истиот се спроведува и како е организан во Австрија, Македонија, Финска, Холандија, Шпанија и Норвешка, но и да ги слушнат препораките на даночните експерти од IBFD.
Пристапот и формите на едукација, но и стратегиите кои ги применуваат даночните администрации е одреден од ставот на даночните обврзници по прашањето на доброволното пријавување и плаќање на даноците. Според општо прифатениот модел, постојат четири групи на даночни обврзници во зависност од нивните ставови: 1) обврзници кои сакаат и се интересираат да постапат правилно; 2) оние кои сакаат доброволно да ги исполнуваат своите обврски, кои се мотивирани, но недоволно стручни; 3) даночни обврзници кои не сакаат да ја исполнат даночната обврска; и 4) кои одлучиле да не ги исполнуваат даночните обврски.
