Почнувајќи од 1 јули 2013 година, тримесечните ДДВ обврзници имаат законска обврска ДДВ-пријавите и даночните биланси за данокот на добивка да ги поднесуваат до УЈП по електронски пат преку системот е-Даноци (согласно Закон за даночна постапка „Службен весник на РМ“, бр.84 од 04.07.2012 година).
Заради навремено усогласување со законските обврски и новините во даночното работење, им препорачуваме на обврзниците и сметководствените бироа да не го чекаат последниот рок и да преземат чекори за регистрација на системот е-Даноци https://etax-fl.ujp.gov.mk/
Што е потребно за регистрација и користење на е-Даноци?
- Дигитален сертификат на USB токен (издаден од овластена куќа) - Доколку веќе поседувате токен за користење на електронските услуги на други институции и банки во Македонија, истиот можете да го користите и за е-Даноци, но само доколку е издаден од овластена куќа. Дигиталниот сертификат на USB токен е неопходен при регистрација и електронско потпишување на формуларите кои ги поднесувате преку https://etax-fl.ujp.gov.mk/
- Интернет - За пристап и непречено работење со e-Даноци, потребнa е минимална интернет конекција со брзина 64 kbps и некој од следните пребарувачи: Internet Explorer 8, Mozilla Firefox или Google Chrome.
- е-Пошта - Електронската пошта со која обврзникот се регистрира на е-Даноци треба да е валидна и иста со онаа која се води во Централниот регистар на РМ.
Постапката за регистрација е едноставна и се врши електронски
Постапката на регистрација се врши преку веб страницата https://etax-fl.ujp.gov.mk/, единствено што треба да направите е да кликнете на копчето “Регистрирај се“ и системот ве води чекор по чекор, како и кои податоци да ги пополните.
Напомена: Тримесечните ДДВ обврзници кои се веќе регистрирани на стариот систем на е-Даноци задолжително треба да извршат миграција кон новиот систем на https://etax-fl.ujp.gov.mk/. Постапката на миграција кон новиот систем на е-Даноци се врши преку веб страницата https://etax-fl.ujp.gov.mk/, со кликнување на копчето “Мигрирај“.
Информирајте се навреме!
За повеќе информации можете да ги преземете корисничките упатства кои се достапни на веб страницата https://etax-fl.ujp.gov.mk/, да не контактирате преку Инфо центарот на 0800 33 000 или да ги посетите обуките на УЈП (види распоред на обуки).
