Од 1 јуни 2010, УЈП воведува нова услуга – Телефонско известување за даночен долг.

Услугата ќе се обезбедува преку Повикувачкиот (Кол) Центар на УЈП, секој ден од 9 до 20 часот, освен недела.
Даночните оператори телефонски ќе ги известуваат даночните обврзници за износот на даночниот долг кој не е платен во законскиот рок.

Новата услуга е во насока на зголемување на процентот на доброволна наплата на даноците и поголема информираност на даночните обврзници за износот на нивниот даночен долг.

Телефонското известување, исто така, претставува превентивна мерка, која има за цел да го информира даночниот должник навремено да реагира како би се избегнала постапката за присилна наплата и активирање на инструментите како што се блокирање на сметки и други, кои УЈП ги користи за наплата на заостанатите даночни долгови.

За позитивниот ефект на овој тип на услуга говорат и податоците од извршените пробни телефонски известувања и позитивната реакција на даночните обврзници кои биле информирани за даночните долгови по основ на ДДВ.
Во месец март, по извршеното телефонско известување на 1.194 даночни обврзници, доброволно е наплатен стар даночен долг во вкупен износ од 43.915.322 денари.