Ги информираме даночните обврзници дека од 24 февруари 2011 година во примена се новите обрасци (објавени во „Службен весник на РМ“, бр. 22/11 од 23.02.2011 година): Биланс на приходи и расходи (образец “Б“) и Годишен даночен биланс за персонален данок на доход (образец “ПДД-ДБ“). Даночните обврзници кои поднеле стари обрасци “Б“ и “ПДД-ДБ“ до 23.02.2011 година ќе бидат прифатени за обработка, а од 24.02.2011 година поднесувањето ќе се врши на новите обрасци''.

На 28 февруари истекува рокот кога правните лица и малите и микро трговци треба да поднесат даночни биланси до Управата за јавни приходи. Заклучно со вчерашниот ден, 10.691 даночни обврзници навреме го пријавиле данокот за добивка, односно годишниот данок за вкупен приход за 2010 година, а до крајот на законскиот рок се очекува вкупниот број на поднесени даночни биланси до Управата да биде над 60 илјади. Со цел обврзниците да го запазат рокот за пријавување на данокот, сите даночни канцеларии низ Републиката на 28 февруари/понеделник/ ќе работат со продолжено работно време до 20.00 часот, а услугите на Контакт центарот во Скопје (ГТЦ, 2-ри кат) се достапни и во сабота/26.02.2011/, во редовното работно време од 9.00 до 20.00 часот.

Ги информираме граѓаните / даночни обврзници на персоналниот данок на доход дека од 10 февруари 2011 година, задолжително треба да се применуваат новите обрасци – аконтативни даночни пријави со кои во Управата за јавни приходи се врши пријавување на: приходи од капитални добивки (образец “ПДД-АДП/КД“); приходи од имот и имотни права (образец “ПДД-АДП/ПИ“); започнување на остварување на приходи од самостојна дејност (образец “ПДД-АДП/СД“) и остварени други приходи (образец “ПДД-АДП/ДП“). Сите обрасци се редизајнирани согласно пропишаните стандарди на УЈП и истите се бесплатни, односно можат да се преземат преку интернет или на шалтерите во УЈП.

Фирмите имаат уште неколку дана, пред истекот на законскиот рок / 15 февруари 2011, до Управата за јавни приходи да поднесат годишни извештаи за приходите кои ги исплатиле на физички лица во текот на изминатата 2010 година. Со цел даночните обврзници да го запазат рокот и навремено да ја исполнат својата обврска, сите шалтери на УЈП низ Републиката во понеделник и вторник, односно на 14 и 15 февруари ќе работат со продолжено работно време до 20.00 часот.

Управата за јавни прихода во организација и поддршка од Постојаниот советник на Меѓународниот монетарен фонд (ММФ) во Македонија, Џорџ Ајзалајн и Советникот од ММФ за надворешна контрола, Ричард Тид, во периодот од 31 јануари до 4 февруари 2011 година, реализира работилница на тема: „Утврдување на ризици, методи и техники за контрола во градежната индустрија“. Целта на работилницата е имплементација на добрите практики и искуства на даночната администрии на САД и европските земји во делот на инспекцискиот надзор на градежништвото, како специфична индустриска гранка од даночен аспект.